Si rezultat i një takimi të punonjësve të Institutit Albanologjik me Entin Leksikografik “Miroslav Kërlezha”, të mbajtur më 20 mars të këtij viti, në Zagreb, këto ditë bibliotekës sonë i ka arritur një fond i çmueshëm botimesh të këtij institucioni me renome në fushën e botime enciklopedike.
Dakordimi për bashkëpunim të shumanshëm ndërinstitucional, duke filluar në fushën e këmbimit të botimeve, ka rezultuar me dhurimin e këtyre titujve për bibliotekën tonë: Enciklopedia kroate në 11 vëllime, Fjalori enciklopedik tetëgjuhësh në 8 vëllime (kroatisht, rusisht, anglisht, frëngisht gjermanisht, italisht, spanjisht dhe latinisht), Leksikoni i përgjithshëm kroat, Fjalori i gjuhës kroate dhe dy vëllime të Enciklopedisë së dikurshme të Jugosllavisë (të botuara në gjuhën shqipe).
Botimet e këtilla janë të një rëndësie të veçantë për studiuesit tanë të fushave të ndryshme. Përveç vlerave të përmbajtjeve, që paraqesin fjalën e fundit të dijes kroate, këto botime karakterizohen edhe me një cilësi të rrallë të përgatitjes teknike.
