Instituti Albanologjik i Prishtinës organizon Tryezën Shkencore: KOSTANDINI I MADH DHE KRISHTERIMI, e cila do të mbahet më 4 dhjetor 2013, në Sallën Shkencore të Institutit Albanologjik. Seanca e hapjes do të jetë në orën 11:00.
Pjesëmarrës me kumtesa do të jenë nga Instituti Albanologjik, Universiteti i Prishtinës “Hasan Prishtina”-Fakulteti Filozofik – Departamenti i Historisë, Instituti i Historisë “Ali Hadri”, Instituti Filozofik dhe Teologjik-Shkodër, Universiteti “Çirili dhe Metodi” – Shkupi dhe Universitet Jug-Perëndim “Neophyte Rilsky” – Blagoevgrad, Bullgari.
Në Tryezë do të trajtohen tërësi tematike si: Perandoria Romake në kohën e Kostandinit të Madh (shek. III-IV); Kontributi i ilirëve dhe i shqiptarëve për përhapjen e Krishterimit; Rëndësia e Ediktit të Milonës (313); Rëndësia e Koncilit të Nikesë (325); Rëndësia kulturore, sociale, politike dhe ekonomike e aktit të legalizimit të Krishterimit; Trashëgimia kulturore e krishterë në vendbanimet shqiptare (objektet kishtare, ikonat, librat etj); Dardania si zonë ndarëse ndërmjet Perandorisë së Lindjes dhe asaj Perëndimore etj.
