Dje (30.10.2013), në orët e hershme të mëngjesit, paprimtas u nda prej nesh, nga gjiri ynë, prej familjes së tij, nga shokët e tij, punonjësi shumëvjeçar në Degën e Gjuhësisë të Institutit Albanologjik.
Shaqir Berani në Institutin Albanologjik (1976) punoi si bashkëpunëtor shkencor, bashkëpunëtor i Lartë shkencor dhe Këshilltar shkencor deri në pensionimin e tij të parakohshëm në rrethanat që u krijuan pas viteve të 90-ta, duke lënë pas vetes një varg veprash shkencore, shumë punime të çmueshme nga gjuhësia dhe nga kultura e gjuhës.
Më 1978 ka mbrojtur temën e magjistraturës “Tiparet fonetike të së folmës së Klinës me rrethina”, kurse më 1984 ka mbrojtur disertacionin e doktorates “Gjuha e Josif Bagerit, me të cilën mori gradën doktor i shkencave filologjike. Gjatë punës së tij në Institut ka kryer detyra me rëndësi, shef i Degës së Gjuhësisë; Sekretar shkencor i Institutit Albanologjik, anëtar e kryeredaktor i revistës “Gjuha shqipe” dhe ka qenë nismëtar e themelues i saj; ka qenë anëtar i revistës “Gjurmime albanologjike” Seria e shkencave filologjike.
Vdekja e papritur e Shaqir Beranit varfëron kulturën shqiptare, në mënyrë të veçantë kulturën e gjuhës shqipe.
